كان صوت مستر علي بيطن في ودن عبد الله زي دوشة سخيفة، مش مركز معاه خالص. عينه كانت لازقة في آية اللي قاعدة جنبه، ضحكتها الهادية وهي بتكتب حاجة في الكشكول كانت بتخطف قلبه. ريحة البرفان بتاعها، اللي كان دايماً خفيف وهادي، كانت بتلف حواليه وتخليه مش قادر ياخد نفسه. كانت لابسة تي شيرت بينك فاتح وبنطلون جينز، وشعرها الأسود متسيب على كتفها. كل تفصيلة فيها كانت بتشد انتباهه أكتر من أي معادلة كيميائية ممكن مستر علي يشرحها.
كأنها حست بيه، رفعت راسها وبصتله. عينيهم اتقابلوا لثواني طويلة، ابتسمتله ابتسامة خجولة، وعبد الله حس بقلبه هيخرج من مكانه. في اللحظة دي، كانت الدنيا كلها بتختفي، مفيش غير هو وهي. مد ايده بالراحة تحت الترابيزة، وصوابعه لمست صوابعها. كانت لمسة سريعة، بس كانت كافية تولع نار جوه كل واحد فيهم. آية سحبت ايدها بسرعة، بس مش قبل ما تضغط على ايده ضغطة خفيفة، كأنها بتوعده بحاجة بعدين.
حمزة كان قاعد قدامهم، وأحمد ويوسف وخالد كانوا موزعينه على باقي الديسكات. كانو كلهم صحاب من زمان، بس محدش فيهم كان بيفهم اللي بيحصل بين عبد الله وآية. العلاقة بينهم كانت حاجة تانية خالص، حاجة أعمق وأكتر خصوصية. كانوا بيتقابلوا كل يوم في الدرس، وفي طريق الرجوع للبيت، وفي أي فرصة تانية يلاقوها.
"عبد الله، ركز معايا يا ابني، المعادلة دي مهمة!" مستر علي قالها بصوته الجهوري اللي فجأة خلى عبد الله يرجع للواقع. بص لعبد الله بنظرة شك، وعبد الله هز راسه بسرعة، عامل نفسه مركز. آية كتمت ضحكتها بصعوبة، وعبد الله ابتسملها ابتسامة سريعة وهو بيحاول يبص في الكتاب عشان مستر علي ميكررش كلامه.
الساعة اللي قضوها في الدرس كانت بتعدي بطيئة أوي، كل دقيقة كانت بتعدي وهو بيتمنى الدرس يخلص عشان يقدر يبقى جنبها تاني من غير خوف. لما مستر علي أخيراً قال "خلاص يا جماعة، أشوفكوا الأسبوع الجاي"، عبد الله حس كأنه اتفك من سجن. قام بسرعة، ولم حاجته، وآية عملت زيه بالظبط.
"يلا بينا يا جماعة؟" حمزة قال وهو بيعدل شنطته على كتفه. كلهم قاموا، وطلعوا من أوضة الدرس. عبد الله وآية كانوا بيمشوا جنب بعض، كأنهم مغناطيس بيتجذبوا لبعض. كانت ايدها بتخبط في ايده بخفة كل شوية، وكل خبطة كانت بتعمل قشعريرة في جسمه. كانت الدنيا حواليهم زحمة، بس هما كانوا في عالم تاني خالص.
---